Токио паралимпиадасида жами 19та медал жамғарган Ўзбекистон жамоаси Тошкентда кутиб олинди. Совриндорларга пул мукофотлари, квартира ва автомобиллар совға қилинди.
Делегация Тошкент халқаро аэропортида кутиб олинди. У ердаги қисқа тантаналардан сўнг жамоа аъзолари жой олган автобуслар карвони “Янги Ўзбекистон” боғига етиб борди.
Маросимда Олий Мажлис Қонунчилик палатаси спикери Нурдинжон Исмоилов ва бош вазир Абдулла Арипов спортчиларни қозонилган муваффақият билан табриклаб, уларга аталган совғаларни топширди.
- Олтин медал соҳибларига:
200 минг доллар, 3 хонали уй, Tahoe автомобили; - Кумуш медал совриндорларига:
100 минг доллар, 2 хонали уй, Traverse автомобили; - Бронза медал совриндорларига:
50 минг доллар, 2 хонали уй, Trailblazer автомобили топширилди.
Маълумот учун, Ўзбекистон Токио паралимпиадасига 48 спортчи билан 55 та йўлланмани қўлга киритган эди. Якунда жамоа 8 та олтин, 5 та кумуш ва 6 та бронза, жами 19 та медалга сазовор бўлди.
Жамоа аъзоларидан Нурхон Қурбонова бирйўла иккита медал билан қайтди: у найза улоқтиришда кумуш, ядро улоқтиришда бронза медалини қўлга киритди.
Умумий ҳисобда Ўзбекистон 162 делегация орасида мусобақани 16-ўринда якунлади.
Бу – Осиё қитъаси (Хитой, Япония ва Эрондан сўнг) ва МДҲ (Россия, Украина ва Озарбайжондан кейин) мамлакатлари орасида тўртинчи, Марказий Осиё ва туркий халқлар орасида биринчи кўрсаткичдир.
Ўзбекистон Рио-2016 Паралимпия ўйинларида ҳам Ўзбекистон 8 та олтин билан 16-ўринни эгаллаганди.
Токиода эришилган 19та медалнинг 9таси енгил атлетика, 6таси дзюдо баҳсларига тўғри келади. Сузишда 2та, таэквондо ва пауэрлифтингда 1тадан медал қўлга киритилди.
Паралимпиада-2021 чемпионлари:
- Учқун Қуронбоев (дзюдо, -66 кг)
- Нозимахон Қаюмова (Ф13 классида найза улоқтириш)
- Моҳигул Ҳамдамова (Ф57 тоифасида диск улоқтириш)
- Феруз Саидов (дзюдо, -73 кг)
- Бобуржон Омонов (Ф41 классида ядро улоқтириш)
- Ҳусниддин Норбеков (Ф35 классида ядро улоқтириш)
- Сафия Бурханова (Ф12 классида ядро улоқтириш)
- Гулжаной Наимова (таэквондо, +58 кг)
Кумуш медал совриндорлари:
- Асила Мирзаёрова (Т11 классида узунликка сакраш)
- Рўза Қўзиева (пауэрлифтинг, -61 кг)
- Парвиза Самандарова (дзюдо, -57 кг)
- Довурхон Кароматов (дзюдо, -81 кг)
- Нурхон Қурбонова (Ф54 классида найза улоқтириш)
Бронза медал совриндорлари:
- Ислом Асланов (100 метрга баттерфлай усулида (S13 класси) пара-сузиш)
- Элбек Султонов (Ф12 классида ядро улоқтириш)
- Нафиса Шерипбаева (дзюдо, -63 кг)
- Шариф Халилов (дзюдо, -100 кг)
- Нурхон Қурбонова (Ф54 классида ядро улоқтириш)
- Шоҳсанам Тошпўлатова (200 метрга комплекс сузиш)
